月供股票 ‧ 下
13/06/2020
睇咗上回月供股票嘅介紹之後,你有冇心郁郁想落場玩吓呢?唔好忘記投資總會有利同弊,不如睇埋月供股票嘅好處同壞處,衡量之後再做判斷啦!
⭕月供股票嘅好處🙆🏻♂️
1. 入場門檻低,適合資金唔充裕之投資者
有啲股票以每手購買需要動則過萬嘅高昂入場費,而月供股票唔使用每手計算買入股票,每月定額供款可以低至500元,因此一時三刻未有龐大資金嘅投資者就可以用月供方式投資心儀的股份。
2. 「平均成本法」分散風險
無論市況係升或跌,月供股票都會喺每個月保持買入,持之以恒嘅現金流能夠捱過一個又一個的經濟週期,利用「平均成本法」減少市場波動對投資者收入帶來嘅影響。
3. 慳返時間同心力
投資者揀定好月供股票、每月供款之後,每月都會根據指令代為買入股票,基本上投資者唔使再時刻留意市況,於是可以慳返本來投入去監察股市嘅時間同心力去其他地方。
4. 逼使養成儲錢習慣
投資者就月供股票每月投入資金,相等於驅使投資者每月儲錢,對於平時儲唔到錢、欠缺紀律同理財知識嘅人嚟講係累積財富嘅好方法。
5. 賺取信用卡積分
部分銀行可以俾投資者用信用卡月供股票嘅同時儲埋積分,於是月供股票之餘投資者仲可以賺埋額外回贈同禮品。
❌月供股票嘅壞處🙅🏻♂️
1. 手續費成本
每月買入股票嘅同時,投資者要繳交包括佣金、印花稅、港交所交易費、保管費等嘅手續費俾銀行/證券行,投資者千萬要細心了解同比較各銀行/證券行嘅手續費安排。
2. 碎股
由於月供股票唔須要用每手計算買入股票,所以好大機會出現碎股。市場對碎股需求唔大因此買賣較難執行,加上碎股多數市價低過正股,市況淡靜,少人願意接貨嘅時候,價格會更平。
3. 唔適合能力高嘅投資者
對於捕捉市況能力高、擁有較多時間分析股市嘅投資者嚟講,月供股票反而令佢哋無法喺絕佳時機低位入貨、高位放出股票,變相佢哋賺嘅收益少咗。
4. 股票選擇有限
銀行/證券行提供嘅月供股票服務並唔係包含所有股票,可以俾投資者揀嘅股票大多數係藍籌股、ETF、同幾隻較熱門嘅二線股票,唔係全部投資者心儀嘅股份都可以月供形式投資。
#N2NAFE #月供股票